Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi

Sosial qayğıya ehtiyacı olan məktəblilərə qış geyimlərinin verilməsi ilə bağlı tədbir keçirilib

01.12.23 17:54

2023-cü il 01 dekabr tarixində Heydər Əliyev Uşaq-Gənclər Yaradıcılıq Mərkəzində sosial qayğıya ehtiyacı olan məktəblilərə qış geyiminin verilməsi ilə bağlı tədbir keçirilib. Bu münasibətlə təşkil olunan tədbirdə, Naxçıvan Muxtar Respublikasında Azərbaycan Respublikası  Prezidentinin səlahiyyətli nümayəndəliyində media məsələləri üzrə məsul şəxs Günay Malikqızı, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova, Naxçıvan Muxtar Respublikasının təhsil nazirinin müavini Elxan Nəcəfov,  Naxçıvan Muxtar Respublikasının əmək və əhalinin sosial müdafiəsi nazirinin müavini Nicat Babayev və Həmkarlar İttifaqları Şurası sədrinin müavini  Ramiz Cəfərov  çıxış edərək muxtar respublikada həyata keçirilən dövlət uşaq siyasətinin uğurlu nəticələri haqqında məlumat vermişlər. Bildirilibdir ki, Bugün bütün kateqoriyalardan olan uşaqların hərtərəfli inkişafı üçün ardıcıl tədbirlər görülür. Onların hüquqlarının və sağlamlıqlarının qorunması, sosial müdafiəsinin təşkili, asudə vaxtlarının səmərəli təşkili, istedadlarının üzə çıxarılması ilə bağlı tədbirlər, o cümlədən monitorinqlər, seminarlar keçirilir.

Çıxış edənlər bildiriblər ki, sağlamlıq imkankarı məhdud  uşaqların sosial müdafiəsi, reabilitasiyası, təhsili və cəmiyyətə inteqrasiyası daim diqqətdə saxlanılır, bu kateqoriyadan olan uşaqlar məktəbəqədər müəssisələrdə, ümumtəhsil məktəblərində təhsilə cəlb olunurlar. Qeyd olunub ki, muxtar respublikada həyata keçirilən kompleks tədbirlər öz bəhrəsini vermiş, sağlamlıq imkanları məhdud uşaqların cəmiyyətə inteqrasiyası istiqamətində yeni mərhələnin təməli qoyulmuşdur. Bu gün sosial qayğıya ehtiyacı olan uşaqların qış geyimləri ilə təmin olunması da bu kateqoriyadan olan uşaqlara göstərilən dövlət qayğısının bariz ifadəsidir.

Tədbirdə sosial qayğıya ehtiyacı olan şagirdlərin valideynləri adından çıxış edən Turanə Tağıyeva bu kateqoriyadan olan uşaqlara göstərilən dövlət qayğısına görə dövlət rəhbərliyinə öz minnətdarlığını bildirib. Tədbirin sonunda sosial qayğıya ehtiyacı olan uşaqlara qış geyimi verilmişdir.

Bildirilir ki, hər iki valideynini itirmiş və ya valideyn himayəsindən məhrum olan, təkvalideynli, sağlamlıq imkanları məhdud, aztəminatlı, çoxuşaqlı, şəhid, qazi övladları olmaqla, 40 uşağa Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən, 264 uşağa Naxçıvan Muxtar Respublikasının Həmkarlar İttifaqları Şurası tərəfindən, 150 uşağa isə Naxçıvan Muxtar Respublikasının Əmək və Əhalinin Sosial Müdafiəsi Nazirliyi tərəfindən qış geyimi verilmişdir. Ümumilikdə 454 xüsusi qayğıya ehtiyacı olan uşaq isti qış geyimi ilə təmin olunub.

Əlavə olaraq bildirilir ki, tədbir anoloji olaraq muxtar respublikanın bütün rayonlarında da təşkil olunmuşdur. Belə ki, Naxçıvan şəhəri üzrə 122, Şərur rayonu üzrə 69, Babək rayonu üzrə 99, Ordubad rayonu üzrə 28, Culfa rayonu üzrə 55, Kəngərli rayonu üzrə 40, Şahbuz rayonu üzrə 14 və Sədərək rayonu üzrə 27 uşaq qış geyimi ilə təmin edilmişdir.

Sosial qayğıya ehtiyacı olan məktəblilərə qış geyimlərinin verilməsi ilə bağlı tədbir keçirilib

01.12.23 09:20

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi, Naxçıvan Muxtar Respublikasının Əmək və Əhalinin Sosial Müdafiəsi Nazirliyi, Babək Rayon İcra Hakimiyyəti, Babək rayon Təhsil Şöbəsi və Həmkarlar İttifaqları Şurasının birgə təşkilatçılığı ilə 01 dekabr 2023-cü il tarixdə Babək rayonunda tədrisə cəlb edilmiş sosial qayğıya ehtiyacı olan ailələrin uşaqlarına qış geyimlərinin verilməsi ilə bağlı tədbir keçirilmişdir. Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi sədrinin müavini Aytən Məmmədova çıxış edərək uşaqlara, o cümlədən xüsusi qayğıya ehtiyacı olan uşaqlara göstərilən diqqət və qayğıdan ətraflı bəhs etmişdir.

Maarifləndirici tədbir keçirilib

30.11.23 18:27

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi, Şərur Rayon İcra Hakimiyyəti və Şərur Rayon Təhsil Şöbəsinin birgə təşkilatçılığı ilə  2023-cü il 30 noyabr tarixdə Şərur rayonu Arbatan kənd tam orta məktəbində “Erkən nikah ailə təməlinin faciəsidir” mövzusunda tədbir keçirilib.

Şərur  Rayon İcra Hakimiyyəti başçısının müavini Aysel Zeynalabdinova tədbir iştirakçılarını salamlayaraq, tədbirin əhəməyyətindən bəhs edib.

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi sədrinin müavini Aytən Məmmədova  bildirib ki, erkən nikah öz-özlüyündə bir neçə problemi əks etdirir. Bunların sırasında ölkənin inkişaf səviyyəsi, onun sosial-iqtisadi vəziyyəti, təhsili, insan hüquqlarının inkişafı və s. dayanır. Erkən nikah probleminin özündə tarixi ənənə yükünü daşıması kimi yanlış stereotiplərin qalması, zorakılıqdan qorumaq məqsədilə valideynlərin qızları erkən nikaha təşviq etməsi, ailənin maddi vəziyyəti, qaçırılma hallarının baş verməsi erkən nikahın yaranma səbəblərindən bir neçəsidir. Erkən nikahın fəsadlarından danışarkən qeyd olunub ki, erkən nikah təhsilin effektiv şəkildə başa çatdıtrılmasına, peşə və həyat bacarıqlarının əldə edilməsi üçün hər hansı bir imkandan məhrum edilməsinə, eyni zamanda boşanma hallarının artmasına və bir sıra xəstəliklərin yayılmasına zəmin yaradır. Eyni zamanda  qeyd olunub ki, erkən nikah heç bir halda normal qəbul edilə bilməz  və birmənalı olaraq gender əsaslı zorakılığın ən bariz nümunəsi kimi göstərilir. A. Məmmədova vurğulayıb ki, erkən nikah əsasında qurulan ailələrdə nikahın pozulması, məişət zorakılığı, sağlamlıq imkanları məhdud uşaqların dünyaya gəlməsi, fiziki-psixoloji çətinliklər, təhsildən məhrumedilmə və şəxsi azadlıqların itirilməsi kimi mənfi nəticələr qaçınılmazdır. Bu yaşda qurulan ailələr çox vaxt ailə funksiyasını yerinə yetirə bilmir, nəsil artımında böyük çətinliklərlə üz-üzə qalmış olur. Ana olmaq iqtidarında olmayan qızlar ana olmağa hazırlıq dövründə ciddi təhlükələrlə üzləşir, onlarda bir sıra xəstəliklərin yaranmasına şərait yaranır. Əksər hallarda isə əqli və fiziki cəhətdən qüsurlu olan uşaqların doğulmasına, ananın və körpənin ölümünə gətirib çıxarır. Erkən yaşda oğlan və qızların ailə qurması həm həkimlər, həm də psixoloqlar tərəfindən düzgün hesab edilmir. Çünki onların fiziki və psixi cəhətdən formalaşması, inkişaf etməsi yetkinlik yaşına çatdıqdan sonra reallaşır. Erkən nikah halları fiziki, əqli, psixoloji və emosional təsirə malik olub, qızların fərdi inkişafını və gələcək imkanlarını məhdudlaşdırmaqla yanaşı, yaşamaq üçün çox təhlükəli HİV, QİÇS, xərçəng və digər bu kimi xəstəliklərə yeni üfüqlər açır.

Şərur Rayon Təhsil Şöbəsinin müdiri Əli Mehdiyev  tədbir haqqında öz fikrini bildirib.

Diskussiya xarakterli keçən tədbirdə iştirakçıların sualları cavablandırılıb. Sonda 40 nəfər tədbir iştirakçısına “Erkən nikah – ailə faciəsinin təməlidir” mövzusunda hazırlanmış broşür paylanılılb.

Maarifləndirici tədbir keçirilib

30.11.23 16:57

2023-cü il 30 noyabr tarixdə Babək rayon  Nehrəm qəsəbə 1 nömrəli  tam orta məktəbdə “Milli dəyərlər və uşaqlar” mövzusunda tədbir keçirilib.

Tədbir  Ümummilli Lider Heydər Əliyevin, Akademik Zərifə Əliyevanın və  şəhidlərin əziz xatirəsinin bir dəqiqəlik sükutla yad edilməsi ilə başlayıb.

Tədbirdə Babək rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin baş məsləhətçisi Şəfa Babayeva  mövzunun əhəmiyyətindən bəhs edərək bildirib ki, qədim və köklü milli-mənəvi dəyərlər sisteminə malik olan xalqımız bu dəyərləri sədaqətlə qorumuş, əsrlərlə yaşatmış və inkişaf etdirmişdir. Milli dəyərlərin qorunması və gələcək nəsillərə çatdırılması, dövlətimizin gələcəyi olan uşaqların milli dəyərlərə bağlılıq ruhunda tərbiyəsi dövlət siyasətinin prioritet istiqamətlərindəndir.

Daha sonra Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin  Ailə, qadın problemləri və gender məsələləri şöbəsinin müdiri Könül Babayeva  qeyd edib ki, belə tədbirlərin keçirilməsinin əhəmiyyəti vacib məsələlərdəndir. Vurğulanıb ki, məktəb dövrü insanın sonrakı həyat tərzinin, düşüncəsinin, xarakterinin formalaşmasında önəmli rol oynamaqla yanaşı, həm də onun kamil bir şəxsiyyət kimi yetişməsində körpü funksiyasını daşıyır. Bu mənada, milli dəyərlərə yiyələnməklə gənc nəslin milli ruhda tərbiyə olunması məsələsi günümüzdə məktəbin qarşısında duran əsas vəzifələrdən biridir. Buna görə də məktəblərdə şagirdlərin geniş biliklərə sahib olması ilə bərabər, milli dəyərlərə bağlı, vətənpərvər kimi formalaşmasına da ciddi yanaşılmalıdır.

Babək rayon Təhsil şöbəsinin metodisti Nazlı Nəcəfova çıxış edərək milli dəyərlərimizin uşaqlara aşılanması, uşaqların zərərli vərdişlərdən uzaqlaşdırılması yollarından, asudə vaxtlarının səmərəli keçirilməsinin təşkilindən, erkən nikah hallarının fəsadlarından, informasiya-kommunikasiya texnologiyalarından düzgün istifadə qaydalarından ətraflı bəhs edib.

Sonda tədbir  iştirakçılarının sualları cavablandırılıb, onlara Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən hazırlanmış “Milli dəyərlərimiz deyəndə nələri başa düşürük?” mövzusunda broşür paylanılıb.